သင့် ဖောက်သည်တွေ မကျေမနပ်ဖြစ်စေနိုင်တဲ့ အဓိကအကြောင်းအရင်း (၅) ချက်

(၁) ဆက်ဆံရေး။

Customer တွေကဝင်လာတယ်။ ဝန်ထမ်းတွေကက ဂရုမစိုက်ဘူး။ လက်လွတ်စပယ်လုပ်မယ်။ လာမယ်လို့ပြောပြီး မလာတော့ဘူး။ သူတို့ကို ရှိတယ်လို့ကို မထင်တာမျိုး၊ သူတို့ကို လှည့်မကြည့်တာမျိုး၊ ဘာလိုသလဲ လာပြီးမေးတာမျိုး ၊ ဂရုမစိုက်တာမျိုး။ ဒါတွေလုပ်ပေးတာမရှိတဲ့အခါမှာ Customer Complain တွေဆိုတာ ဖြစ်လာတယ်။ တခါတလေမှာ ဝန်ထမ်းတွေရဲ့ နေပုံထိုင်ပုံနဲ့လည်းဆိုင်တယ်။ သူတို့နေပုံထိုင်ပုံက Customer အပေါ် မယဉ်ကျေးတဲ့အပြုမူ ဖြစ်သွားရင် ဆက်ဆံရေး မကောင်းတဲ့ထဲမှာ ပါတယ်။ အဲဒီတော့ ဆက်ဆံရေးအားနည်းတာက လုပ်ငန်းတွေမှာ Customer တွေ မကျေနပ်ရတဲ့အကြောင်းအရင်း တစ်ခုဖြစ်တယ်။ ဒါတွေကလုပ်ငန်းတွေမှာ အဓိကခက်ခဲတဲ့ အရာတွေဖြစ်တယ်။ အဲဒီတော့ Leader တွေက ဝန်ထမ်းတွေကို Customer Service နဲ့ပတ်သက်ပြီးတော့ ဆက်ဆံရေးမှာ ဘယ်လိုမျိုးဆက်ဆံရမယ်၊ ဘယ်လိုမျိုး ပြောဆိုရမယ်ဆိုတာ သေချာသင်ပေးရပါမယ်။

(၂) မှားယွင်းတာ။

မှားယွင်းတယ်ဆိုတာက Order ယူကတည်းက မှားသွားတာ။ သူပြောတာကို မှတ်ကတည်းကိုက မှားသွားတာ။ မှားသွားပြီးတော့ Process က အကြာကြီး Run တယ်။ ပြီးတော့မှ သွားပေးတဲ့အခါ ထင်သလိုမဖြစ်ဘူး။ တခါတလေမှာ Customer တွေက သူတို့လိုချင်တဲ့ဟာကို ရဖို့အတွက်စောင့်နေရတာ။ စောင့်နေပြီးမှ ရလည်းရလာရော တလွဲဖြစ်နေတယ်ဆို သွားရော။ ဥပမာ – စားသောက်ဆိုင်တွေမှာ သွားထိုင်တယ် ဆိုပါစို့။ မွေးနေ့ပါတီလုပ်နေတဲ့အခါမျိုး တစ်ခုခုမှားသွားလို့ စိတ်အနှောင့်အယှက်ဖြစ်ရတယ်ဆိုရင် အဲဒီမွေးနေ့ပွဲက ပျက်သွားရော။ အဲဒီအတွက်ကြောင့် Order ယူရင် သေသေချာချာ မှန်မှန်ကန်ကန် ယူပြီးတော့ သေချာပေးနိုင်ဖို့ အများကြီးဂရုစိုက်သင့်တယ်။

(၃) ကြန့်ကြာတာ။

ကြာတယ်ဆိုတာ လုပ်ပေးမယ်လို့ပြောထားတယ်။ တကယ်တော့ မလုပ်ပေးနိုင်ဘူး။ ဒါတွေက စားသောက်ဆိုင်တွေမှာ ထိုင်တဲ့သူတွေ အများကြီးကြုံနိုင်တယ်။ မြင်သာတဲ့ ဥပမာတစ်ခုပေးရရင် အပ်ချုပ်ဆိုင်တွေမှာ အင်္ကျီတစ်ထည်သွားချုပ်တယ်။ အထည်တွေအပ်ပြီးသွားရင် ၂ ပါတ်နေရင် ရမယ်လို့ပြောလိုက်လို့ သွားယူရင်မရဘူး။ နောက်တစ်ခေါက်ထပ်သွားတယ်၊ မရသေးဘူး။ အဲဒီအခါ ကြာတော့ လူက စိတ်မရှည်တော့ဘူး။ ကတိပျက်သလိုခံစားရတယ်။ ဒီလုပ်ငန်းနဲ့ မဆက်ဆံချင်တော့ဘူး။ အဲဒီတော့ ပိုကောင်းတဲ့ Service ရှိတဲ့နေရာတွေ့ရင် ပြောင်းသွားလိမ့်မယ်။ အဲဒီတော့ Life Time Value Customer က ကိုယ့်ကို ရေရှည်ပိုက်ဆံအများကြီးပေးနိုင်တဲ့ အနေအထားကနေ မပေးတော့ဘူးဖြစ်သွားတယ်။ ဆုံးရှုံးမှုတွေ အရမ်းများတယ်။ အဲဒီအတွက်ကြောင့် ကြန့်ကြာတာကို ဂရုစိုက်သင့်တယ်။ သူ့အတွက် မြန်နိုင်သမျှမြန်အောင် ကိုယ်ကြိုတင်ပြင်ဆင်ထားနိုင်တာ ဘာတွေလဲ။ နောက်ကနေပိုမြန်အောင် ဘယ်လိုနည်းလမ်းတွေနဲ့ လုပ်လို့ရမလဲ စဉ်းစားသင့်တယ်။

(၄) စံနှုန်း။

Customer တွေအနေနဲ့ ကိုယ့်ဆီက Product သို့မဟုတ် Service ရရင် ဘယ်လိုမျိုးရရမယ်ဆိုတဲ့ Expectation ပေးထားမိတယ်။ ကြော်ငြာတုန်းက ဘယ်လိုမျိုးပြောထားမိသလဲ။ ပါနေကျ ပါဝင်နှုန်းကဘာလဲ။ ပါနေကျ အရသာက ဘယ်လိုလဲ။ အဲဒီစံနှုန်းအတိုင်း မဟုတ်ဘဲနဲ့ လွဲသွားရင် လူကမကြိုက်တော့ဘူး။ ဒီလုပ်ငန်းကို လာပြီးအားပေးတယ်ဆိုကတည်းက ဒီ Standard ကြောင့် လာအားပေးတာ။ Standard မရှိရင် သူမပျော်တော့ဘူးဆိုတာ နားလည်ကြဖို့ အရေးကြီးတယ်။

(၅) မသန့်ရှင်းတာ။

ဥပမာ – ဝန်ထမ်းတွေက ခံတွင်းနံ့နံတာ၊ ကိုယ်နံ ချိုင်းနံ့နံတာ၊ ရေမွှေးတွေ စွတ်ပြီးသုံးထားတာ။ ဒါတွေက Hospitality industry မှာ လုပ်တဲ့သူတွေသိတယ်။ ဒါတွေက မလုပ်သင့်တဲ့အရာတွေဖြစ်တယ်။ ဒါမှမဟုတ်လည်း ပရုတ်ဆီ လိမ်းထားတာမျိုးတွေ၊ ဒါမှမဟုတ်ရင် လုပ်ငန်းနယ်ပယ်ထဲမှာ မသန့်ရှင်းတာတွေရှိနေတာမျိုး၊ ရွှံ့တွေ ဗွက်တွေ ပေနေတာမျိုး၊ ဖုန်တွေများနေတာမျိုး ဖြစ်မယ်၊ ယင်ကောင်တွေ ခြင်တွေများနေတာ ဒါမျိုးတွေ ဖြစ်မယ်။ အစားအသောက်ထဲမှာဆိုရင် မပါသင့်တာ ပါသွားတာမျိုးတွေ။ ဒါတွေက ပြဿနာအကြီးကြီးတွေပဲ။ ဒါတွေနဲ့ပတ်သက်ပြီးတော့လည်း သေချာရှင်းနိုင်တာမရှိရင် လုပ်ငန်းက နာမည်ပျက်မယ်။ အခုလိုမျိုး Facebook ခေတ်မှာဆိုရင် ဓာတ်ပုံရိုက်ပြီးတင်ရင် အကုန်ရှုပ်ကုန်ရော။ အဲဒီအတွက်ကြောင့် Customer တွေ စိတ်ကျေနပ်ဖို့ဆိုရင် ခုနကပြောတဲ့ အချက် (၅)ချက်ရှိတယ်။ အဲဒီမကျေနပ်တဲ့အချက် (၅)ချက်ကို ရှင်းနိုင်ပြီး ကျေနပ်တဲ့ဘက်ကို ရောက်သွားရင် လုပ်ငန်းတိုးတက်ဖို့ အများကြီးအထောက်အကူဖြစ်ပါတယ်။

Naing Win Aung (MBA, PCC)
CEO Coach & NLP Master Trainer
Leadership Development Facilitator

naingwinaungceocoach

naingwinaungexecutivecoach

Leadership #Coaching #Transformation #NLP

Breakthrough_Coaching_Myanmar

Make_Myanmar_A_Better_Place