လုပ်ငန်းတိုးတက်မှု အစီအစဉ်ရေးဆွဲခြင်းအတွက် အရေးပါတဲ့ အချက် (၃) ချက်

လုပ်ငန်းတိုးတက်ဖို့အတွက် Business Plan ဆွဲတဲ့အခါမှာ ပုံမှန်အားဖြင့် အစဉ်အလာအတိုင်းဆွဲတဲ့နည်းကို Breakthrough မှာ သိပ်သုံးလေ့မရှိဘူး။ အဲဒါတွေက အများကြီး ကျယ်ကျယ်ပြန့်ပြန့် လေ့လာရပြီး လုပ်စရာတွေလည်း အရမ်းများပါတယ်။ ကျွန်တော်တို့ Coach တွေအနေနဲ့ လိုရင်းတိုရှင်းနဲ့ စီးပွားရေးလုပ်ငန်းရှင်တွေ လိုချင်တာ ဘာလဲဆိုတာသိပြီးတော့ သူတို့လိုချင်တာတွေ ရအောင် ဘယ်လိုလုပ်မလဲဆိုတဲ့ ဘက်ကို မြန်မြန်ဆန်ဆန် သွားတယ်။ Strategic Planning လို့ ပြောရင် အဓိကက လုပ်ငန်းတစ်ခုမှာ သူလိုချင်တဲ့ရလဒ်ကို အရင်းအနည်းဆုံးနဲ့ ရအောင်ဘယ်လိုလုပ်မလဲ ဆိုပြီး ယေဘုယျအားဖြင့် ခေါ်တာ ဖြစ်တယ်။ လုပ်ငန်းအစီအစဉ်ရေးဆွဲပြီးတော့ လုပ်ငန်းကို တိုးတက်အောင် လုပ်တဲ့နေရာမှာ အရေးကြီးတဲ့ (၃)ချက် ရှိတယ်။

(၁) ငါဘယ်လိုရလဒ်တွေကို လိုချင်တာလဲ။

အဓိကလိုချင်တာ ရောင်းအားလိုချင်တာ။ ရောင်းအားကို ဘယ်လောက်လိုချင်တာလဲ၊ အတိအကျ သတ်မှတ်ရမယ်။ အမြတ်ကို ဘယ်လောက်လိုချင်တာလဲ။ တိတိကျကျ သတ်မှတ်ရမယ်။ ရောင်းအားဘယ်လောက်လိုချင်တာလဲ မေးခွန်းမှာ ကိုယ်ရောင်းမယ့် Product ဘယ်နစ်ခုရှိလဲ။ လက်ရှိမှာ Product စုစုပေါင်းအရောင်းကို (၁၀၀)လို့ ထားမယ်ဆိုရင် Product Category အုပ်စုတစ်ခုချင်းမှာ ဘယ်လောက်တွေ ရောင်းနေတာလဲ။ ဘယ်ဟာတွေကို အရောင်း ဘယ်လောက်လိုချင်တာလဲ။ ပြီးရင်တော့ ကုန်ကျစရိတ်တွေကို ဘယ်လောက်ပဲ ရှိစေချင်တာလဲ။ ဒီနေရာမှာ Budget Team တွေနဲ့ တွဲပြီးလုပ်သွားနိုင်ရင်တော့ ကောင်းတယ်။ ဒါမှမဟုတ်ရင် Profit and Lost ဘယ်လမှာရောင်းအား ဘယ်လောက်ရှိရမယ်၊ စရိတ် ဘယ်လောက်ရှိရမယ်၊ အမြတ်ဘယ်လောက်ရှိရမယ်။

အဲဒီအတိုင်း တစ်လချင်းလုပ်ထားပြီး တစ်နှစ်စာ ဆွဲထားလိုက်ရင် ကိုယ်လိုချင်တဲ့ ရောင်းအားနဲ့ စရိတ်တွေ ထွက်လာမှာဖြစ်တယ်။ အချို့သော Small Business Owner တွေနဲ့ အောင်မြင်တဲ့ လုပ်ငန်းရှင်တွေတောင်မှ ရောင်းအားသာ ကောင်းနေတာ၊ ငွေသာ လည်ပါတ်နေတာ ။ ဘယ်လောက် မြတ်လို့ မြတ်မှန်းမသိ။ ဘယ်လောက်လိုချင်သလဲ မသိ။ သေချာ တိတိကျကျ မသတ်မှတ်ထားတာမျိုးတွေ ရှိနိုင်တယ်။ အသုံးစရိတ်ဆိုလည်း ဘယ်လောက်ပဲသုံးမယ်ဆိုတာ သတ်မှတ်ထားရမယ်။ ဒါတွေကတော့ ငွေကြေးနဲ့ပတ်သတ်ပြီး ပြောတာ။ ဒါပေမယ့် လုပ်ငန်းရှင်တွေ လိုချင်တာက ငွေကြေးတစ်ခုတည်း မဟုတ်ဘူး။

ဥပမာ လုပ်ငန်းက စနစ်မကျတဲ့အတွက် စနစ်ကျချင်တယ်။ ကျွန်တော် Coach လုပ်ပေးဖူးတဲ့ လုပ်ငန်းရှင်တစ်ယောက်ဆိုရင် သူမပါဘဲနဲ့ လည်ပတ်နိုင်လောက်တဲ့ အခြေအနေမျိုး လိုချင်တယ်။ အချိန်ဘယ်လောက်အတွင်း လိုချင်တာလဲဆိုရင် တစ်လခွဲ နှစ်လအတွင်း။ သူနဲ့ တိုက်ရိုက် တွေ့ပြီးတော့ ကျွန်တော်ပြောပြတယ်။ သူလုပ်ငန်းရဲ့ လက်ရှိအနေအထားနဲ့ လုပ်ငန်းကို (၂) လ လောက်အတွင်း အကုန်လုံး စနစ်ကျသွားချင်တာ အရမ်း Realistic မဖြစ်ဘူး။ Coach တစ်ယောက် အနေနဲ့ ဒီလို စကားမျိုးပြောရတာ အရမ်းကို တာဝန်ကြီးတယ်။ ပုံမှန်အားဖြင့် ပြောလေ့မရှိပါဘူး။ ဒါပေမယ့် ဖြစ်နိုင်ချေ အလွန်ဝေးတဲ့ အခြေအနေတစ်ခုကို သွားလုပ်ရင် သူ့အတွက်က ဝန်ထုပ်ဝန်ပိုးတစ်ခု ဖြစ်နိုင်တယ်။ ဒါမှမဟုတ် သူ လုပ်လိုက်ရင်လည်း အဲဒီပြဿနာက ပြန်လည်နေမှာ။ အပေါ်ယံလောက် လုပ်မိမှာ။ အဲဒီတော့ မရတဲ့အကြောင်း သူ့ကို ပြောပြတယ်။ အဲဒီအခါမှာ ဒါနဲ့ပတ်သတ်ပြီး (၆) လလောက် မှန်းတာပေါ့။ (၆) လ လောက်အတွင်း မှာ ကိုယ်မပါဘဲ လည်ပတ်နိုင်လောက်တဲ့အဆင့် ဆိုတာထက် တာဝန်အသီးသီးခွဲပြီး Objective တစ်ခုချလိုက်ရင် အားလုံးသူ့ဟာနဲ့သူလုပ်လာတဲ့ အဆင့်ရောက်ဖို့ ကျွန်တော်နဲ့ ဆက်ပြီးဆွေးနွေးခဲ့တယ်။

အရေးကြီးတာက လုပ်ငန်းမှာ Number of Customer များချင်တာလား၊ ဈေးကွက်ရှယ်ယာ ပိုပြီးများချင်တာလား၊ ဘယ်မြို့တွေမှာသွားပြီး ဈေးကွက်တိုးချဲ့ချင်တာလဲ၊ ဘယ်လိုမျိုး Product တွေ ဆက်ပြီးတော့ Launch လုပ်ချင်တာလဲ။ ဒါမှမဟုတ် ဝန်ထမ်းအဝင်အထွက် အရမ်းများနေတယ်ဆိုရင် ထွက်တဲ့ရာခိုင်နှုန်းကို လျော့ချချင်တာလား။ ကိုယ်ဘယ်လိုရလဒ်ကို လိုချင်တာလဲ။ ဒါတွေနဲ့ ပတ်သက်ပြီးတော့ သေသေချာချာ သတ်မှတ်ဖို့လိုတယ်။ များသောအားဖြင့်က အဲဒီအဆင့်ပြီးသွားရင် လုပ်ငန်းရှင်တွေနဲ့ Leader တွေက ဘယ်ကိုရောက်သွားကြလဲဆိုတော့ ဒါကို ငါတို့ရအောင် ဘယ်လိုလုပ်မလဲ။ အဲဒီဘက်ကို သွားတယ်။ အဲဒီလိုသွားတာက အရမ်းကိုကြီးမားတဲ့ အမှားအယွင်း တစ်ခုပါ။ အဲဒီတော့ လုပ်သင့်တာက ဘယ်လိုရအောင် လုပ်မလဲမဟုတ်ဘူး။

(၂) ဘာကြောင့်လိုချင်တာလဲ။

ကိုယ်လိုချင်တဲ့ အဓိက Objective, Result, Goal ကို ရွေးပြီးသွားရင် အဲဒီတစ်ခုချင်းကို ဘာကြောင့်လိုချင်တာလဲဆိုတာ သေချာသတ်မှတ်ရမယ်။ အဲဒီလိုသတ်မှတ်မှ ကျွန်တော်တို့ရဲ့ ရင်ထဲကို ကူးစက်သွားလိမ့်မယ်။ Leader ကိုယ်တိုင်က ဒါနဲ့ပတ်သက်ပြီး ဖြစ်ချင်စိတ်တွေ များလာတော့မှ သူ့ရဲ့ နောက်လိုက်တွေကလည်း ဒါနဲ့ပတ်သက်ပြီး ပြင်းပြင်းပြပြ လိုချင်စိတ်တွေရှိလာမယ်။ Leader ကိုယ်တိုင်က ဒါနဲ့ ပတ်သက်ပြီး Drive မရှိဘူး၊ အင်တိုက်အားတိုက် လုပ်ချင်စိတ်မရှိဘူးဆိုရင် လက်တွေ့ဖြစ်လာဖို့ဆိုတာ အမှန်တကယ် နည်းတယ်။ အဲဒီအတွက်ကြောင့် တစ်ချက်ခြင်း နဲ့ ပတ်သက်ပြီး ကိုယ်ဘာကြောင့် လိုချင်တာလဲ သေချာသတ်မှတ်ရမယ်။

ရောင်းအားတက်ဖို့လိုမယ်။ ရောင်းအားက ဒီအတိုင်းသွားရင် အလုပ်ကလုပ်သလောက်၊ အချိန်ကုန် ငွေကုန်သလောက် ပိုက်ဆံက မရဘူး၊ အကျိုးမရှိဘူး၊ အချိန်ကုန်တယ်။ ဥပမာ – ဝန်ထမ်းအဝင်အထွက်ကို လျှော့ချဖို့ လိုတယ်။ ဘာလို့ လျှော့ချဖို့လိုလဲ။ ကိုယ်ကသင်လိုက်တယ်၊ ထွက်သွားတယ်။ တက်သွားရင် ထွက်သွားတယ်။ အဲဒီလိုတွေဖြစ်နေရင် လုပ်ငန်းက အချိန်တွေကုန်တယ်။ သူတို့ကို သင်ကြားပေးလိုက်ရတဲ့ ငွေကြေးတွေ ဆုံးရှုံးတယ် ။ အကယ်၍များ ဝန်ထမ်းတွေကို ထွက်တာ နည်းသွားအောင် လုပ်နိုင်တယ်။ အဝင်အထွက် မရှိသလောက်ဖြစ်သွားတယ်ဆိုရင် ပိုကောင်းလာမယ်။ လုပ်ငန်းခွင်မှာ Culture တွေ၊ စည်းလုံးညီညွတ်မှုတွေ ပိုကောင်းလာပြီးတော့ Customer Service တွေလည်း ပိုကောင်းလာနိုင်တယ်။ မလိုလားအပ်တဲ့ အချိန်တွေကုန် ငွေတွေကုန်တာမျိုးတွေလည်း နည်းသွားမယ်။

(၃) အဲဒါကိုရအောင် ဘယ်လိုလုပ်မလဲ။

ဘယ်လိုလုပ်မလဲဆိုတဲ့ အခါမှာလည်း တချို့လူတွေက ကျွန်တော်တို့ Coaching ကို Consulting လို့ ထင်တာ။ အကြံဉာဏ်တောင်းမယ်လို့ ထင်တာ။
ကျွန်တော်တို့ Coach တွေက လူတွေကို သူ့ဘာသာသူ စဉ်းစားလာနိုင်အောင် လုပ်ပေးတာ။ အဲဒီတော့ မသိတာတွေကို ခဏဘေးဖယ်ထားလိုက်။ သိတာတွေအရင်ပြော။ ဒါနဲ့ပတ်သက်ပြီးတော့ ဘာတွေလုပ်ရမလဲဆိုတာ မသိဘူး။ လောလောဆယ်မှာ သိထားတာတွေ ဘာတွေရှိလဲ။ သိထားတာတွေ ပြီးသွားရင် ထင်တာတွေ ဘာတွေရှိလဲ။ နောက်ထပ်သိအောင် လုပ်လို့ရတဲ့နည်း ဘာတွေရှိလဲ။ အဲဒါတွေ အကုန်လုံးကို ချရေးပြီးတော့မှ အဲဒီထဲမှာ ဘယ်နည်းလမ်းက ဖြစ်နိုင်ချေ အများဆုံးရှိလဲ။ ဘယ်လိုစလုပ်ရင်ကောင်းမလဲ။ ဒါတွေကို စဉ်းစားသွားမယ်ဆိုရင် အများကြီး နီးစပ်တယ်။ မိတ်ဆွေတွေအားလုံးပဲ လုပ်ငန်းရှေ့ဆက်ဖို့ စဉ်းစားတဲ့နေရာမှာ ဘယ်လိုရလဒ်တွေကို လိုချင်တာလဲ။ ဘာကြောင့် လိုချင်တာလဲ။ အဲဒါတွေကိုရအောင် ဘယ်လိုလုပ်မလဲ။ အဲဒီအချက်တွေကို ကိုယ်ကိုယ်တိုင်နဲ့ Executive Team Member တွေကိုစုပြီးတော့ သေချာလေးစဉ်းစားကြည့်ပါ။ အဖြေရှာကြည့်ပါ။ အကျိုးရှိမယ်လို့ ကျွန်တော့် အနေနဲ့ ယုံကြည်ပါတယ်။

Naing Win Aung (MBA, PCC)
CEO Coach & NLP Master Trainer
Leadership Development Facilitator

naingwinaungceocoach

naingwinaungexecutivecoach

#Leadership #Coaching #Transformation

#NLP #Breakthrough

#Breakthrough_Coaching_Myanmar

#Make_Myanmar_A_Better_Place